"Napoli"nin hücumçusu Viktor Osimhen Nigeriya millisində olarkən zədələnib.

Matc.az xəbər verir ki, bu barədə yerli mətbuat məlumat yayıb. ötən gün Nigeriya Səudiyyə Ərəbistanı ilə yoldaşlıq görüşündə heç-heçə edib - 2:2. Osimhen zədə səbəbindən əvəzlənmədən əvvəl 59 dəqiqə oynayıb. Oyundan sonra komandanın baş məşqçisi Xose Pezeyro futbolçunun zədəsi haqda danışıb: "Napoli" ilə əlaqə saxlayırıq. Futbolçuların sağlamlığına cavabdeh olduğumuz üçün hər matçın sonunda klubları məlumatlandırmaq üçün hesabat göndəririk. Osimhen fantastik oyunçudur. Ona hamımızın ehtiyacı var. İndi onlar testlər aparacaqlar və ondan sonra zədənin şiddətindən asılı olaraq onun Neapola qayıdacağı, yoxsa burada qalacağına qərar verəcəyik. Onu riskə atmaq onun bir-iki ay sıradan çıxmasını riskə atmaq deməkdi. Təbii ki, onun oynamasını istərdim, amma ona maaş verən klublara hörmət etməliyik. Bu, hər kəsə aiddir".