“Avrokubok olacaq, ya olmayacaq, bu, başqa məsələdir”.

Matc.az xəbər verir ki, bu sözləri Azərbaycan Premyer Liqasında “Sumqayıt”a 2:0 hesabı ilə məğlub olan “Araz-Naxçıvan”ın baş məşqçisi Azər Bağırov deyib. Çalışdırıcı oyundan sonra mətbuat konfransında iştirak edib: "Çətin oyun oldu. Məğlub olanda nələrisə demək çətin olur. Furbolçularımı təbrik edirəm. İkinci hissə əla oynadılar. Mənim üçün hansısa məğlubiyyətdən nəyisə çıxarırıqsa, o bir qələbədir. Uduzmağımıza baxmayaraq, oynadıq".

- Bu gün nə çatmadı?

- Bizim böyük heyətimiz yoxdur. Bu əsas səbəblərdən biridir. Legioner baxımından problem yoxdur. Amma yerli futbolçu baxımından çətinliyimiz var. Bayraməlini heç biriniz tanımırsınız. Bu gün o özünü göstərdi. Millinin məşqçiləri də nəzərə alar yəqin ki. Yoxdan var etmək istəyirik.

- Bəlkə,  "Qarabağ" üzərində qələbə futbolçularda arxayınçılıq yaradıb?

- Yox, düşünmürəm elə olsun. Bu gün vacib olan odur ki, biz nələrin çatmadığını bilirik. Böyük ölçüdə uduzduq bu gün. Topları götürə bilmirdik. Bu da bizə baha başa gəldi.

- Orxan Əliyevin startda olmaması nə ilə bağlıdır?

- Son iki oyunda əsas heyətdə idi. Zəhərlənmişdi, ona görə ehtiyatda saxladıq, sonra meydana buraxdıq. Səhhətində olan problemə görə startda olmadı.

- Avrokubok hədəfi varmı?

- Düşündüyüm oyundan-oyuna komandanı hazırlamaqdır. Hazırda zədəlimiz yoxdur. Bu, bizi sevindirir. Gedişat yaxşı irəliləməkdir. Avrokubok olacaq, ya olmayacaq, bu, başqa məsələdir. Biz artıq başımızdan yuxarı tullanmışıq.

- İndidən transferini düşündüyünüz futbolçular var?

- Var, amma alınacaq, ya yox, bunu bilmirik. Transfer dönəmində dəvətlərimizi göndərəcəyik. İşimizi aparırıq, bəyəndiyimiz oyunçular var. Bugünkü gündə ən böyük problemimiz yerli oyunçu qıtlığıdır.

- Tahir Tahiroviçi sizi Azərbaycanın ən yaxşı baş məşqçisi adlandırdı.

- Bir az emosiyalara qapıldı. O da sevdiyimiz şəxsdir. İndi kimsə deyə bilməz ki, Qurban Qurbanovdan böyük məşqçi var. Onun etdiklərinin heç dırnaq qədərini etməmişik. Azərbaycan futbolunda Qurban Qurbanov var. Yerdə qalanlar isə çalışır ki, hardasa ona mane olsun. Onu bizim kimi məşqçilərlə müqayisə etmək olmaz.