“Bu dəqiqə transfer haqda düşünmürük. Hazırda bizim problemimiz transfer deyil. Çempionata geniş baxsaq 22 xalımız var”.

"Turan Tovuz" Azərbaycan Premyer Liqasının 18-ci turunda doğma meydanda "Araz-Naxçıvan"ı 3:1 hesabı ilə məğlub edib.

Matc.az xəbər verir ki, qərb bölgəsi təmsilçisinin baş məşqçisi Ayxan Abbasov matçdan sonra keçirilən mətbuat konfransında jurnalistlərin suallarını cavablandırıb:

- Dünən üzücü hadisə oldu. Allaha şükür itkisiz, xəsarətsiz başa çatdı. İstəməzdik belə olsun. Hər işdə bir xeyir var. Çətin komandaya qarşı oynayırdıq. "Araz-Naxçıvan" həm turnir cədvəlində, həm son oyunlarda özündən söz etdirən komandadır. Ağır bir qrafikdə idik.Çox təəsüf kubok oyununda məğlub olduq, amma ondan qabaq qalib gəlmişdik. Çempionat oyununda ardıcıl 2-ci qalibiyyətimizdi. Futbolçularımdan razıyam. Xal fərqimizin çox qopmamağı yaxşı oldu. Qış toplanışını yaxşı keçməliyik. Mövsümün ikinci yarısı daha ağır keçəcək. Klub olaraq inkişaf etməliyik. Oyun sistemimiz yaxşılaşmalıdır. Bu il yaxşı şeylər çoxdur. Ötən mövsümün ilk yarısını 17 xalla 6-cı yerdə bitirmişdik. Bu il isə 22 xal toplamışıq və 7-ci yerdəyik. Qışdan sonra bundan da yaxşı olmaq lazımdır.

- Qışda transferlər gözlənilir?

- Bu dəqiqə transfer haqda düşünmürük. Hazırda bizim problemimiz transfer deyil. Çempionata geniş baxsaq 22 xalımız var. Bizi qane etməyən iki oyunumuz olub. Biri səfərdə "Qəbələ" ilə, digəri isə evdə "Səbail"lə matç. Digər oyunlarda komanda məğlub olsaq belə, rəqibdən zəif olmamışıq. Bəzi hakim səhvləri oldu. Bu gün 25-26 xalımız ola bilərdi. Və bu gün tam başqa söhbət edə bilərik. Amma bu, futboldur. Böyük çempionatlarda da belə hallar qaçılmazdır. Hər dövrə 11 xal yığmışıq. Bundan bir az yaxşı olmaq lazımdır ki, yuxarı pillələrə gedək. 

- Bu heyətlə avrokuboklara vəsiqə qazanmaq mümkündür?

- Çempionatın əvvəlindən hədəfimizi demişik. Gələcək üçün iddialı olmaq istəyirik. Bir ildə iddialı ola bilməzsən. Bizdə səhv yanaşma var. Bir çox klublar bunun badına gediblər. Bu gün qarşımıza avrokubok hədəfi qoymamışıq. Bunun üçün bizdən üstdəki klublar qədər büdcəmiz olmalıdır. Hələ ona tələsmirik. Eləyə bilərik. Amma bir yol seçmişik. Avrokuboklara vəsiqə qazansaq, sevinəcəyik. Qazanmasaq da, faciə olmayacaq. Əsas məqsədimiz Premyer Liqada möhkəmlənməkdir.