“Araz-Naxçıvan” qış fasiləsində heyətinə yeni futbolçular cəlb edəcək. Matc.az xəbər verir ki, bunu Premyer Liqa klubunun baş məşqçisi Azər Bağırov məlumat verib.

Mütəxəssis yanvarın 16-17-nə qədər transfer məsələlərinə yekun vuracaqlarını bildirib.

O, “Zirə”nin yarımmüdafiəçisi Rəhim Sadıxovla maraqlandıqlarını təsdiqləyib: “Rəhim izlədiyimiz futbolçulardandı. Həm də millimizdə 10 nömrə mövqeyində oynayan 3-4 nəfərdən biridi. Bizim isə yerli futbolçu baxımından çatışmazlığımız var. Alınsa, yaxşı olar. “Zirə” onu transferə çıxarsa da, hələ bu məsələ həllini tapmayıb”.

Baş məşqçi qış fasiləsində hücumçu axtarışında olduqlarını da gizlətməyib.

Qeyd edək ki, 2022-ci ilin yayından “Zirə”nin formasını geyinən Rəhim Sadıxovun bakılılarla müqaviləsi mövsümün sonuna qədərdi.