AFFA-nın İntizam Komitəsinin iclasında aşağı yaş qrupları üzrə liqalarda baş verən neqativ hallara da baxılıb. Matc.az xəbər verir ki, bu barədə AFFA-nın saytında məlumat yayılıb.

AFFA U-15 Liqasında keçirilən Turan Tovuz FK-Qarabağ FK oyununda Qarabağ FK komandasının heyətində Oqtay Mehrəliyev qarşılaşmanın 80+4-cü dəqiqəsində komanda yoldaşını təhqir etdiyi üçün qırmızı vərəqə ilə cəzalandırılmasına görə 3 oyunluq cəzalandırılıb.

Həmin matçda Qarabağ FK komandasının baş məşqçisi Rauf Əliyev qarşılaşmanın 67-ci dəqiqəsində hakimi təhqir etdiyinə görə qırmızı vərəqə ilə cəzalandırıldıqdan sonra hakimləri təhqir və təhdid etdiyinə, oyunboyu hakimlərin ünvanına təhqiramiz ifadələr səsləndirməyə davam etdiyinə görə 5 oyunluq cəzalandırılıb, müstəsna hal olaraq 500 manat cərimə edilib.

Qarşılaşmada Qarabağ FK komandasının azarkeşləri hakimləri təhqir və təhdid etdiyinə, bu hal oyunboyu davam etdiyinə görə “Qarabağ” FK U-15 komandasının növbəti oyunu azarkeşləri olmadan keçiriləcək.

AFFA U-12 Liqasında keçirilməli olan Ələt FK-Ərgünəş FK (Sumqayıt) oyunu Ərgünəş FK komandası təyin edilən vaxt meydanda olmadığına görə baş tutmadığı üçün Ərgünəş FK komandasına 0:3 hesablı texniki məğlubiyyət verilib.