Azərbaycan milli komandasının baş məşqçisi Fernandu Santuş DÇ-2026-nın seçmə mərhələsinin püşkünü dəyərləndirib. Matc.az xəbər verir ki, portuqaliyalı çalışdırıcı AFFA-nın rəsmi saytına bununla bağlı açıqlama verib.

Santuş püşkün nəticəsi ilə bağlı bunları deyib: “Artıq püşk atılıb, heç nəyi dəyişmək mümkün deyil. İndi daha vacibi rəqibləri yaxından tanımaqdı. Fransa, yoxsa Xorvatiya ilə qarşılaşacağımız UEFA Millətlər Liqasının pley-off mərhələsindən sonra bəlli olacaq. Digər rəqiblərimiz isə Ukrayna və İslandiya seçmələridi. İndi ən önəmlisi komandamızı bu oyunlara hazırlamaqdı. Mart və iyunda rəsmi matçlarımızın olmaması yaxşı haldı. Qrup oyunlarına hazırlaşmaq üçün vaxtımız olacaq. Həmin dönəmlərdə yoldaşlıq görüşləri keçirəcəyik ki, yığmamız sentyabrda başlayacaq seçmə mərhələ matçlarına hazır olsun”.

Qeyd edək ki, millimizin D qrupundakı rəqibləri UEFA Millətlər Liqasının 1/4 final mərhələsinin Fransa - Xorvatiya cütünün qalibi, həmçinin Ukrayna və İslandiya yığmalarıdı. Bu qrupda mübarizə 2025-ci ilin sentyabrında başlayacaq.