10 Avqust 2022, 11:14
ÇEMPİONLAR LİQASI

"Qarabağ"ın baş məşqçisi Qurban Qurbanov UEFA çempionlar Liqasının 3-cü təsnifat mərhələsində Macarıstanda "Ferenstvaroş"a qarşı keçirdikləri cavab oyununu şərh edib. Matc.az xəbər verir ki, o, Heydər Əliyev Beynəlxalq Hava Limanında jurnalistlərə açıqlamasında 3:1 hesabı ilə qalib gəldikləri matçla bağlı bunları söyləyib:
 
"Komandamız istənilən oyunu ortaya qoydu. Əlbəttə, oyunu ələ almaq, üstünlüyü öz tərəfinə keçirmək istəyirsən. Bunlar bəzən alınır, bəzən yox. Bəzən də rəqib oyuna daha yaxşı başlayır. Sevinirik ki, cavab görüşü bizim üçün çox yaxşı başladı. Erkən qol vurmaq istəyirdik, bu da alındı. Deməzdim ki, rəqibi yaxşı təhlil etmişdik və ya əlavə bir şey ortaya qoyduq. Sadəcə, düşündüyümüzü daha yaxşı etdik və rəqibə qarşı daha sıx oynadıq. Şadıq ki, hər şey bizim tərəfimizdə oldu. Oyundan əvvəl və sonra rəqib baş məşqçi Stanislav çerçesovla görüşümüz oldu. Qarşılaşmanın ardından bizi qələbə münasibətilə təbrik etdi".
 
50 yaşlı mütəxəssis çempionlar Liqasının pley-off mərhələsində qarşılaşacaqları çexiyanın "Viktoriya" (Plzen) komandası ilə oyunlara da toxunub:
 
"Viktoriya" ilə oyunların əhəmiyyətini çox yaxşı anlayırıq. Bu oyunlara böyük ümidlərlə hazırlaşacaq, əlimizdəki şanslardan maksimum yararlanmağa çalışacağıq. Bilirik ki, bu rəqibi də üstələsək, çempionlar Liqasının qrup mərhələsinə düşəcəyik. Daha yaxşı, daha istəkli olmalı və daha da səhvsiz oynamağa çalışmalıyıq. Rəqibi tam təhlil edəndən sonra daha ətraflı fikir bildirmək olar. Hər halda bu komanda çempionlar Liqasının pley-offuna elə-belə gəlməyib. ümumiyyətlə, çexiya futbolu çox intizamlıdır. çox yaxşı müdafiə xətləri olur, standart vəziyyətlərdə xeyli təhlükəli olurlar. Tam təhlil etdikdən sonra rəqibə qarşı yaxşı oyun qurmaq və uğurlu nəticə əldə etmək üçün ən yaxşısını ortaya qoyacağımıza inanıram".
 
Qurbanov ilk görüşü Bakıda keçirmələrini komandası üçün üstünlük saydığını gizlətməyib: "İlk oyunun Bakıda olmasına gəldikdə, xeyirlisi, qismətimizdə budursa, razılaşmalıyıq. İlk matça ciddi hazırlaşmalıyıq. İnanıram ki, ev oyunu üstünlüyümüz olar".
 
Baş məşqçi pley-off mərhələsinədək heyətə yeni oyunçu cəlb etməyin mümkünlüyünü də dilə gətirib. Qurbanovun fikrincə, bu, baş verməsə belə, hazırkı heyət də hədəfə çatmaq üçün yetərlidir: "Müdafiə xətti ilə bağlı hazırda hər hansı fikrimiz yoxdur. Amma ola bilər ki, digər mövqelərə hər hansı dəyişiklik olsun. Olmasa belə, hazırkı heyət yetərlidir və çox istəklə çıxış edirlər, çox həvəslidir. İstədiyimiz oyunçuları əldə edə bilsək, mütləq götürəcəyik, olmasa, elə bu heyətlə də davam edəcəyik".
 
Qurbanov onu da bildirib ki, "Qarabağ" Azərbaycan Premyer Liqasında 2-ci turun "Sumqayıt"la səfər matçının təxirə salınması üçün Peşəkar Futbol Liqasına müraciət etməyəcək.
 
Qeyd edək ki, "Qarabağ"ın "Sumqayıt"la oyunu avqustun 13-də Sumqayıtda baş tutacaq. "Viktoriya" ilə qarşılaşmalar isə 16/17 avqustda evdə, 23/24 avqustda səfərdə olacaq.

XƏBƏRİ PAYLAŞ
  • gplus
  • pinterest