2024/25 Çempionlar Liqası tarixə düşəcək, çünki Avropanın ən nüfuzlu klub turnirində ilk dəfə bizə tanış olan qrup mərhələsini görməyəcəyik. Matc.az xəbər verir ki, əvəzində 36 komanda vahid liqada oynayacaq, hər komanda 8 fərqli rəqibə qarşı 8 oyun keçirəcək.

Aydındır ki, buna görə Çempionlar Liqası üçün püşkatma prinsipi də dəyişəcək, çünki yeni formatdan istifadə edərək onu əl ilə keçirmək qətiyyən mümkün deyil.

Bu gün rəsmi olaraq məlum olub ki, liqa mərhələsinin püşkatması kompüter vasitəsilə aparılacaq. Bunun üçün UEFA xüsusi proqram sifariş edib. Komandanın hansı oyunları evdə, hansılarını səfərdə keçirəcəyi də eyni proqramla müəyyənləşəcək.

Avropa Liqası və Konfrans Liqasının püşkatma mərasimi də eyni prinsip əsasında keçiriləcək.

Əlavə edək ki, yeni formata əsasən, ilk 8 yeri tutan komandaların Çempionlar Liqasının 1/8 final mərhələsinə birbaşa yüksələcək. 9-24-cü yerləri tutanlar 1/8 finala çıxmaq üçün öz aralarında əlavə pley-off mərhələsi keçirəcəklər.

Qeyd edək ki, hazırda əsas mərhələnin 29 iştirakçısı artıq bəllidir və daha 7 komanda təsnifat yolu ilə seçiləcək. Son seçmə pley-off oyunları avqustun 28-də baş tutacaq. Liqa mərhələsinin püşkatma mərasimi avqustun 29-na təyin edilib.